Son dövrlərdə infarkt hallarının həm yaşlılar, həm də gənclər arasında artması narahatlıq doğurur.
E-saglam.az xəbər verir ki, kardioloq Dr. Hüseyin Özdil bu vəziyyətin təhlükəli olduğunu bildirərək infarkt əlamətlərini tanımağın və düzgün reaksiya verməyin vacibliyini vurğulayır. Sinə ortasında sıxıcı ağrı, çiyin, qol, boyun və arxaya yayılan narahatlıq, soyuq tər, ürəkbulanma kimi əlamətlər varsa, dərhal tibbi yardıma müraciət olunmalıdır. Dr. Özdil bildirir ki, bu vəziyyətdə aspirin çeynəmək və 112-yə zəng etmək həyat xilas edə bilər. Aspirin qan laxtalanmasını azaldaraq infarktın təsirini zəiflədə bilər, lakin ilkin müdaxilə tibbi heyət tərəfindən aparılmalıdır.
İnfarkt riski yüksək qan təzyiqi, xolesterol, diabet və siqaret istifadəsi ilə artır. Gənclər arasında artan halların səbəbləri arasında elektron siqaret, enerji içkiləri və fast food istehlakı da göstərilir. Son illərdə 40 yaşdan aşağı şəxslər arasında infarkt səbəbindən ölüm halları artmaqdadır. Özdil xəbərdarlıq edir ki, bu risklərə qarşı sağlam həyat tərzi seçilməli və vaxtında tədbir görülməlidir.
Tərcümə: Könül Oruc
