İnsan papillomavirusunun (HPV) bəzi növləri düşündüyümüzdən daha təhlükəli ola bilər.
E-saglam.az xəbər verir ki, Beta-HPV adlanan nadir növün ultrabənövşəyi şüaların təsirini gücləndirərək dəri xərçənginə dolayı təsir göstərə bildiyi bilinirdi. Lakin yeni araşdırma göstərib ki, virus bədənin hüceyrələrinə birbaşa daxil olaraq xərçəngin böyüməsini sürətləndirə bilər.
Nəticələr alnında aqressiv dəri skuamöz hüceyrəli karsinoma (cSCC) inkişaf edən 34 yaşlı qadının müalicəsi zamanı ortaya çıxıb. Onun şişi cərrahi əməliyyat və immunoterapiyadan sonra belə təkrarlanırdı. Genetik analizlər virusun şişin DNT-sinə inteqrasiya etdiyini və xərçəngə səbəb olan zülallar istehsal etdiyini üzə çıxardı.
ABŞ Milli Allergiya və Yoluxucu Xəstəliklər İnstitutunun immunoloqu Andrea Lisko bildirib ki, bu kəşf immun sistemi zəif olan insanlarda dəri xərçənginin necə inkişaf etdiyini anlamaqda mühüm addımdır. Araşdırmanın mövzusu olan qadında T hüceyrələrinin fəaliyyətini pozan irsi immun çatışmazlığı aşkarlanıb. O, həm də HPV ilə bağlı digər problemlərdən – ziyillərdən və ağız infeksiyalarından əziyyət çəkirdi.
Xəstəyə sümük iliyi kök hüceyrə transplantasiyası tətbiq olundu və nəticədə immun sistemi bərpa edildi. Üç illik müşahidə müddətində xərçəng və digər HPV ilə bağlı xəstəliklər geri qayıtmadı.
Mütəxəssislər bildirir ki, bu nadir hadisə UV şüalarının dəri xərçəngində əsas risk faktoru olduğunu dəyişmir. Ancaq bəzi hallarda zəif immun sisteminə malik insanlarda normalda təhlükəsiz hesab edilən viruslar ölümcül nəticələrə gətirib çıxara bilər.
Alimlər hesab edirlər ki, bu kəşf gələcəkdə fərdiləşdirilmiş, hədəflənmiş müalicələrin inkişafına yol aça bilər. Əlavə olaraq, HPV-yə qarşı peyvəndin bəzi xərçənglərin qarşısını almaqda böyük uğur qazandığı kimi, oxşar yanaşmalar dəri xərçənglərinin müalicəsində də dönüş nöqtəsi ola bilər.
Araşdırma "The New England Journal of Medicine" jurnalında dərc olunub.
Tərcümə: Könül Oruc
