Edinburq Universitetinin alimləri 3D çap texnologiyasından istifadə edərək süni qan damarları yaradıblar.
E-saglam.az xəbər verir ki, bu barədə “Interesting Engineering”də məlumat dərc olunub.
Bildirilib ki, insan damarlarına yaxından bənzəyən bu innovativ geləbənzər borular açıq ürək əməliyyatları zamanı inqilab yarada bilər və dünyada bir çox xəstələr üçün müalicə nəticələrini yaxşılaşdıra bilər.
Qeyd olunur ki, süni qan damarları, həmçinin səhiyyə xərclərini azalda və həyati əhəmiyyətli xidmətlərə çıxışı artıra bilərlər.
“Bu kəşf həm də ürək-damar xəstəliklərinin müalicəsi sahəsində fərdiləşdirilmiş tibbin inkişafına gətirib çıxara bilər ki, bu da xəstələrin fərdi ehtiyacları əsasında süni qan damarlarının yaradılmasına imkan verir”, - məqalədə deyilir.
Tədqiqatçılar qeyd edirlər ki, süni qan damarları geniş tətbiq sahəsi üçün diametri 1 ilə 40 mm arasında dəyişən qalınlıqlarda hazırlana bilər:
“Onun elastikliyi süni qan damarlarının insan orqanizminə asanlıqla inteqrasiya oluna bilməsinə imkan yaradır”.
