İzmirdə yaşayan 90 yaşlı Şerife Demirkıranın qarnından 11 kiloqramlıq şiş uğurla çıxarılıb.
E-saglam.az xəbər verir ki, 6 uşaq və 20 nəvəsi olan qadın keçən il şiddətli qarın ağrıları səbəbindən xəstəxanaya müraciət edib. Müayinələr zamanı qarnında kütlə aşkar edilib və dərman müalicəsinə başlanıb. Lakin kütlə sürətlə böyüyərək nəfəs almaqda çətinlik yaratmağa başlayıb.
Xəstə ötən ay İzmir Atatürk Təhsil və Araşdırma Xəstəxanasına yerləşdirilib. Ümumi cərrahiyyə mütəxəssisi Prof. Dr. Osman Nuri Dilek xəstənin yaşı və ürək problemləri səbəbindən əməliyyatın çox riskli olduğunu, lakin etmədikləri halda həyati təhlükə yarandığını bildirib. Xəstə və ailəsinin razılığı ilə iki saatlıq əməliyyat həyata keçirilib və 30 santimetr enində olan nəhəng kütlə çıxarılıb.
Demirkıran əməliyyatdan sonra sağlamlığını bərpa edərək evə buraxılıb. O, sağaldığı üçün xoşbəxt olduğunu bildirib. Prof. Dr. Dilek əməliyyatın çətinliyini vurğulayaraq, vaxtında qərar vermənin vacibliyini qeyd edib. Xəstə artıq normal qidalanır və hərəkət edir. Həkimlər onun "ikinci baharını" yaşadığını bildiriblər.
Tərcümə: Könül Oruc
