Mütəxəssislər qarpızın təkcə susuzluğu aradan qaldırmadığını, həm də sağlamlıq üçün bir sıra faydalar verdiyini bildiriblər.
E-saglam.az xəbər verir ki, onların sözlərinə görə, qarpız antioksidantlarla zəngindir. Bu maddələr orqanizmdə iltihabın azalmasına kömək edir, oynaq sağlamlığını dəstəkləyir və ürək-damar xəstəlikləri, şəkərli diabet, Alzheimer xəstəliyi və bəzi xərçəng növlərinin riskinin azaldılmasına töhfə verə bilər.
Mütəxəssislər qeyd ediblər ki, qarpızın tərkibində olan L-sitrulin qan damarlarının genişlənməsinə kömək edir, qan dövranını yaxşılaşdırır və fiziki dözümlülüyü artırmağa dəstək olur.
Qarpızın dəri sağlamlığı üçün də faydalı olduğu vurğulanıb. Meyvənin tərkibindəki A və C vitaminləri dərinin sağlam görünüşünü qorumağa kömək edir. Eyni zamanda, güclü antioksidant olan likopen günəş şüalarının yaratdığı zədələrə və yaş ləkələrinin yaranmasına qarşı qoruyucu təsir göstərə bilər.
Mütəxəssislər əlavə ediblər ki, qarpız yay ayları üçün ideal qəlyanaltıdır. Tərkibinin təxminən 95 faizini su təşkil etdiyindən orqanizmin maye ehtiyacının ödənilməsinə kömək edir. Təbii şirin dadı isə onu yüksək kalorili və yağlı desertlərə daha sağlam alternativə çevirir.
Tərcümə: Könül Oruc
