Kefir – dadını asanlıqla fərdiləşdirə biləcəyiniz, aşağı kalorili və faydalı bir süd məhsuludur.
E-saglam.az xəbər verir ki, zəngin qida dəyəri və probiotik tərkibi ilə sağlam qidalanma planlarının əvəzolunmaz hissəsinə çevrilə bilər. Gündə bir stəkan kefir içməyiniz üçün əsas səbəbləri təqdim edirik.
Kefir, qatığa bənzər mayalanmış süd məhsuludur. Qatı deyildir və adətən içki formasında istehlak olunur. Tərkibində canlı maya və faydalı bakteriyalar var. Sadə formada içilə bildiyi kimi, meyvə, bal və ya digər təbii dadlandırıcılarla da uyğunlaşdırıla bilər.
1. Bağırsaq mikrobiomunu dəstəkləyir
Kefirdə 30-dan çox probiotik növü var. Bu, bağırsaqlardakı faydalı bakteriyaların artmasına kömək edir, zərərli mikroorqanizmlərin çoxalmasının qarşısını alır və həzm sistemini tarazlayır. Qaz və şişkinlik kimi narahatlıqları azaldır.
2. İltihabı azaldır
Kefirdəki probiotiklər immun sistemini tənzimləyərək bağırsaqlarda iltihabı azaldır. Antibiotikdən sonra və ya həzm pozğunluğu zamanı orqanizmin bərpasını dəstəkləyir.
3. Sümük sağlamlığını gücləndirir
Kefir kalsium, maqnezium, K2 vitamini və bəzi hallarda D vitamini ilə zəngindir. Bu maddələr birlikdə sümük sıxlığını qoruyur və osteoporoz riskini azaldır.
4. İmmunitet sistemini gücləndirir
Kefirin tərkibindəki probiotiklərlə yanaşı, B vitaminləri və sink immun sistemini dəstəkləyir. Bağırsaqlardakı immun hüceyrələri aktivləşdirərək bədəni infeksiyalara qarşı daha güclü edir.
5. Əzələ kütləsini qoruyur
Kefir bütün əsas amin turşularını ehtiva edən tam zülal mənbəyidir. Bu xüsusiyyət, xüsusilə yaş artdıqca əzələ itkisinin qarşısını almaq üçün vacibdir.
Kefir necə saxlanmalıdır?
Kefir açıldıqdan sonra soyuducuda saxlanmalı və iki həftə ərzində istehlak edilməlidir. Fermentasiya olunmuş məhsul olduğu üçün asan xarab olmur, lakin zaman keçdikcə turş dadı daha da güclənə bilər.
Kefir sağlam qidalanma planına asanlıqla daxil edilə bilən faydalı içkidir. Gündəlik vitamin və mineral ehtiyacını qarşılamaqla yanaşı, ümumi həyat keyfiyyətinə də müsbət təsir göstərir.
Tərcümə: Könül Oruc
