Yay aylarının sevilən meyvələrindən olan qırmızı moruq təkcə dadı ilə deyil, sağlamlığa faydaları ilə də diqqət çəkir.
E-saglam.az xəbər verir ki, həkimlər və qidalanma mütəxəssisləri moruğu "təbii dərman" adlandırır.
Araşdırmalara görə, moruq güclü antioksidantlarla, C vitamini və liflə zəngindir. Bu tərkibi sayəsində orqanizmdə sərbəst radikallarla mübarizə aparır, hüceyrələrin zədələnməsinin qarşısını alır və immun sistemini möhkəmləndirir.
Qan şəkərini tənzimləyir, xərçəng riskini azaldır
Moruq flavonoidlər və ellagik turşu kimi birləşmələrlə zəngindir. Bu maddələr iltihabəleyhinə təsir göstərir, bəzi tədqiqatlarda isə xərçəng hüceyrələrinin inkişafını ləngitdiyi bildirilib. Aşağı glikemik indeksə malik olan bu meyvə şəkər xəstələri üçün də münasib seçim sayılır.
Həzm sistemini dəstəkləyir
Moruq yüksək lif tərkibinə görə bağırsaqların fəaliyyətini tənzimləyir, qəbizliyin qarşısını alır. Eyni zamanda mədə üçün yüngül və rahat həzm olunan bir meyvədir.
Dəriyə parlaqlıq verir
Antioksidantlar sayəsində dərini qocalmaya qarşı qoruyur, kollagenin parçalanmasını ləngidir. Yay aylarında moruq yemək həm bədəni, həm də dərini içdən qidalandırır.
Necə istifadə olunmalıdır?
Qırmızı moruğu təzə şəkildə yemək ən faydalı üsuldur. Salatlara, smuzi və yoqurtlara əlavə edə, həmçinin səhər yeməklərinə daxil edə bilərsiniz. Lakin alarkən təzə və təmiz yuyulmuş moruğa üstünlük verilməli, çirkli və ya küflənmiş meyvələrdən uzaq durulmalıdır.
Qeyd: Moruq allergik reaksiyalara səbəb ola biləcəyi üçün uşaqlara və allergiyaya meyilli şəxslərə ehtiyatla verilməlidir.
Könül Oruc
