Sağlam ağciyərlərin qorunması xüsusilə çirklənmiş mühitdə ümumi sağlamlıq üçün son dərəcə vacibdir. Dərindən nəfəs almaq, təbii vasitələrə üstünlük vermək və düzgün həyat tərzi seçmək ağciyərləri təmizləyərək tənəffüs sisteminin güclənməsinə kömək edir.
E-saglam.az xəbər verir ki, aşağıda ağciyərləri təbii yollarla dəstəkləməyin effektiv üsulları təqdim olunur:
Dərin nəfəs məşqləri edin
Dərin nəfəs almaq ağciyər tutumunu artırır, oksigenin qana keçməsini yaxşılaşdırır və selik yığılmasını azaldır. Bu üsul tənəffüs əzələlərini gücləndirir və nəfəs almanı təbii şəkildə səmərəli edir.
Kifayət qədər su için
Su tənəffüs yollarındakı selikli qişaların nəmlənməsini təmin edir və ağciyərlərin daha asan işləməsinə şərait yaradır. Su toksinlərin təmizlənməsinə və mucusun boşalmasına da kömək edir.
Buxar terapiyasından istifadə edin
Buxarla nəfəs alma tənəffüs yollarını genişləndirir, bəlğəmi yumşaldır və ağciyərləri rahatlaşdırır. Bu üsul allergen və çirkləndirici hissəcikləri təmizləyərək nəfəsin açılmasına səbəb olur.
Müntəzəm fiziki məşqlər edin
Gəzinti, velosiped sürmək və ya üzgüçülük kimi aerobik fəaliyyətlər ağciyərlərin işləmə qabiliyyətini artırır. Məşq dövriyyəni sürətləndirir, oksigen axınını artırır və ağciyərlərin özünü təmizləməsini dəstəkləyir.
Antioksidanla zəngin qidalar qəbul edin
Çiyələk, ispanaq, zəncəfil və zərdəçal kimi qidalar ağciyərləri iltihabdan qoruyur, hüceyrələrin bərpasını və oksidləşmə stressinə qarşı mübarizəni gücləndirir.
Çirkli mühitlərdən uzaq olun
Tüstü, toz və kimyəvi qıcıqlandırıcılardan mümkün qədər uzaq durmaq lazımdır. Maska taxmaq və hava təmizləyici cihazlardan istifadə ağciyərləri zərərli hissəciklərdən qoruyur.
Yatarkən düzgün mövqe seçin
Bədən mövqeyinin dəyişdirilməsi bəzi ağciyər sahələrindən mucusun axmasına şərait yaradır. Bu üsul hava axınını yaxşılaşdırır və nəfəs almağı asanlaşdırır, xüsusilə xroniki tənəffüs problemi olanlar üçün faydalıdır.
Bitki çayları için
Zəncəfil, biyan kökü və nanə çayları bəlğəmgətirici və iltihabəleyhinə təsir göstərir. Tənəffüs yollarını rahatlaşdırır, qıcıqlanmanı azaldır və nəfəs almağı yüngülləşdirir.
Bu sadə, lakin təsirli üsullar ağciyərlərinizi təmiz və güclü saxlamağa kömək edərək ümumi sağlamlığınızı müsbət yöndə təsirləndirə bilər.
Tərcümə: Könül Oruc
