Uroloq Anastasiya Kortışkova sistitin simptomlarını yüngülləşdirmək üçün sadə tövsiyələr təqdim edib.
E-saglam.az xəbər verir ki, o, bu xəstəliklə mübarizədə qəhvə, spirt, sitrus meyvələri və ədviyyatlı qidalardan uzaq durmağı məsləhət görüb. Bu qidalar və içkilər sidik kisəsini qıcıqlandıra bilər, yanma və ağrını artırır. Onlardan müvəqqəti imtina bədənin daha tez sağalmasına kömək edə bilər.
Həkim, eyni zamanda, gündə ən azı iki-üç litr su içməyi tövsiyə edib. Bu, tez-tez sidiyə getməklə sidik kisəsində bakteriyaların yığılmasının qarşısını alır və infeksiyanın yayılma riskini azaldır.
Kortışkova isti vannalardan, saunadan və istilik yastıqlarından uzaq durmağı da məsləhət görüb. İstilik qan dövranını artıraraq infeksiyanın yayılmasına səbəb ola bilər.
Sistitin müalicəsi mütləq həkim nəzarətində aparılmalıdır, lakin həkimə müraciət etmək mümkün deyilsə, antibakterial dərmanlardan istifadə etmək olar. O, fosfomisin (Monural) və ya nitrofurantoin kimi dərmanların müvafiq dozada istifadəsini tövsiyə edib.
Sistitin simptomlarını yüngülləşdirmək üçün bu tövsiyələrə əməl etmək, həmçinin müntəzəm tibbi məsləhət almaq vacibdir. Sağlamlığınızı qorumaq üçün vaxtında tədbirlər görmək hər zaman önəmlidir.
Sistit nədir? Niyə kifayət qədər başa düşülmür?
Sidik yollarının infeksiyalarının (SYİ) simptomlarına sidik ifrazı zamanı yanma və ağrı, qəfil və ya tez-tez sidiyə çıxmaq istəyi, bulanıq, qanlı və ya qoxulu sidik, qızdırma, titrəmə, qarnın aşağı hissəsində ağrı daxildir.
Xəstəlik adətən E.coli bakteriyaları tərəfindən törədilir. Ancaq digər bakteriyalar da bu xəstəliyə səbəb ola bilər
Qadınların təqribən 40-50%-i həyatlarında heç olmasa bir dəfə kəskin sistit keçirib, 20-30%-i isə sidik yolları infeksiyalarının ilk epizodundan sonra 3-4 ay ərzində residivlə qarşılaşır. Onların 10-20%-i bütün həyatları boyu residivləşən sistitdən əziyyət çəkir.
Tərcümə: Könül Oruc
