Öd kisəsinin sağlam qalması üçün qidalanmada düzgün seçim çox önəmlidir.
E-saglam.az xəbər verir ki, ən faydalı qidalardan biri liflə zəngin tərəvəzlərdir. Xüsusən brokoli, gül kələm, ispanaq və çuğundur ödün daha duru qalmasına kömək edir və qatılaşmanın qarşısını alır.
Tam taxıl məhsulları da mühüm rol oynayır. Yulaf, qarabaşaq və qəhvəyi düyü bağırsaq hərəkətini yaxşılaşdıraraq öd axınını stimullaşdırır. Həftəlik menyuda mütləq yer almalıdır.
Sağlam yağlar arasında zeytun yağı ilk sıradadır. Çiy halda az miqdarda qəbul edildikdə öd durğunluğunu azaldır və həzmi yüngülləşdirir. Balıqda olan omega-3 yağları da öd kisəsi üçün çox faydalıdır, buna görə həftədə 2–3 dəfə balıq yemək tövsiyə olunur.
Çiy qoz, badam və digər toxumlar öd tərkibini sabit saxlayır və daş riskini azaldır. Bu qidalar həm də yaxşı enerji qaynağıdır.
Gündə kifayət qədər su içmək isə bütün bu proseslərin əsasını təşkil edir. Su ödün axıcılığını artırır və qatılaşmanın qarşısını alan ən vacib amillərdən biridir.
Bu sadə qida seçimləri öd kisəsinin sağlam işləməsinə, daş və iltihab riskinin azalmasına əhəmiyyətli dərəcədə kömək edə bilər.
Könül Oruc
