Somnoloq Suzan Vayli bildirib ki, daim qaranlıqda oyanmaq bədənin bioloji saatını pozur və ciddi sağlamlıq riskləri yaradır.
E-saglam.az xəbər verir ki, o, açıqlamasında bu vərdişin təhlükəli nəticələrindən danışıb.
Mütəxəssisin sözlərinə görə, işıq sirkadiyalı ritmlərin – bədənin ayıqlıq və yuxululuq dövrlərini idarə edən daxili saatın – əsas tənzimləyicisidir. Günəş çıxmazdan əvvəl oyanan insan beyninə səhər işığı siqnalı çatmır. Bu zaman bizi ayıltmalı olan kortizol səviyyəsi yüksəlmir, yuxu hormonu olan melatonin isə azalmaq əvəzinə yüksək qalır.
Bu vəziyyət gün ərzində həddindən artıq yuxululuq, diqqətin azalması, koqnitiv funksiyaların – düşünmə və qərarvermə proseslərinin – yavaşlaması ilə nəticələnir. Vayli bildirib ki, qaranlıqda oyanan insanlar tez-tez əhvalın pisləşməsi, motivasiyanın azalması və əsəbilikdən şikayət edirlər.
Somnoloq əlavə edib ki, davamlı pozulmuş yuxu rejimi yüksək qan təzyiqi, 2-ci tip diabet və çəki artımı kimi sağlamlıq problemləri riskini də artırır.
Tərcümə: Könül Oruc
