Sağlamlıq
Təmizləyici vasitənin üzərində bu simvol yoxdursa,
Sağlamlıq
119

Təmizləyici vasitənin üzərində bu simvol yoxdursa, qəti almayın - təhlükəlidir

Evlərdə ən çox istifadə edilən təmizləyici məhsulların üzərindəki təhlükəsizlik simvolları çox vaxt nəzərdən qaçırılır, halbuki bu işarələr həyati xəbərdarlıqlar daşıyır.

E-saglam.az xəbər verir ki, Avropa Kimyəvi Maddələr Agentliyi (ECHA) etiketsiz və ya məcburi təhlükə simvolları olmayan yuyucu vasitələrin zəhərlənmə və digər sağlamlıq fəsadlarına səbəb ola biləcəyi barədə xəbərdarlıq edib.

Mütəxəssislərin fikrincə, yanlış etiketlənmiş və ya heç bir təhlükəsizlik məlumatı olmayan təmizləyici məhsullar görünməyən bir risk yaradır. Son dövrdə kimyəvi təmas hallarının artması yuyucu vasitə seçərkən daha diqqətli olmağın əhəmiyyətini göstərir. ECHA belə məhsulların istifadəsinin dərhal dayandırılmasını tövsiyə edir.

ECHA-nın kimyəvi təhlükəsizlik üzrə eksperti Dr. Anna Müller bildirib ki, etiketində məcburi təhlükə simvolları olmayan heç bir məhsul təhlükəsiz hesab edilə bilməz. Onun sözlərinə görə, tərkib və risk səviyyəsi məlum olmayan təmizləyici vasitələr istehlakçı üçün ciddi təhlükə yaradır.

Təmizləyici məhsulların qablaşdırmasında korroziv maddə, qıcıqlandırıcı təsir, ətraf mühitə ziyan, alovlanma təhlükəsi kimi simvolların olması tələb olunur. Bu işarələr həm məlumatlandırıcı, həm də istifadəçini birbaşa təhlükələrdən qoruyan xəbərdarlıqlardır.

Bundan əlavə, məhsulda istifadə qaydaları, istehsalçı məlumatları, tərkib siyahısı, allergen bildirişi və UFI kodu kimi digər vacib məlumatlar da mütləq olmalıdır. Bu məlumatların yoxluğu məhsulun icazəsiz istehsal oluna biləcəyini göstərir və riskləri daha da artırır.

Mütəxəssislər xəbərdarlıq edirlər ki, etiketsiz və markasız təmizləyici məhsullar dəri və göz yanıqları, tənəffüs problemləri, ev heyvanlarında zəhərlənmə kimi ciddi fəsadlara səbəb ola bilər. Zəhərlənmə halında tərkibin bilinməməsi təcili tibbi yardımı da çətinləşdirir.

ECHA təhlükəsiz seçim üçün simvolları yoxlamağı, yalnız orijinal qablaşdırmada satılan məhsullara üstünlük verməyi və allergen xəbərdarlıqlarını diqqətlə oxumağı tövsiyə edir.

Tərcümə: Könül Oruc

E-saglam.az


Bizi Facebook-da izləyin
Bizi Instagram-da izləyin
Bizi YouTube-da izləyin
Bizi TikTok-da izlə

Yeniliklərdən xəbərdar olun

Həftəlik tibbi xəbərlər və məsləhətlər üçün abunə olun