İltihabəleyhinə təsiri ilə məşhur olan qızıl ədviyyat - zərdəçal düşündüyünüz qədər zərərsiz olmaya bilər.
E-saglam.az xəbər verir ki, həkim Sohaib İmtiaz zərdəçal haqqında çoxlarının bilmədiyi, lakin sağlamlıq üçün olduqca vacib olan beş mühüm faktı açıqlayıb.
Həkim bildirir ki, zərdəçalın (sarıkök) qəbulunda zaman böyük rol oynayır. Onu ən yaxşısı axşam yağlı yeməklərlə birlikdə istifadə etməkdir. Acqarına və ya yatmazdan əvvəl qəbul edildikdə isə mədə narahatlığı və yuxu pozuntularına səbəb ola bilər.
Mütəxəssis əlavə edir ki, zərdəçal bəzi dərmanlarla təhlükəli qarşılıqlı təsirə girə bilər. Qan durulaşdıran preparatlarla birlikdə qəbul edildikdə qanaxma riskini artırır, şəkərsalıcı dərmanların təsirini gücləndirərək hipoqlikemiyaya yol aça bilər və qan təzyiqi dərmanlarının metabolizmini pozur.
Zərdəçalın yan təsirləri də var. Həzm problemləri, allergiya və ürəkbulanma ilə yanaşı, o, öd kisəsinin daralmasına səbəb ola bilər. Bu isə öd daşı olan insanlar üçün ciddi risk yaradır.
Araşdırmalara görə, zərdəçal dəmir udulmasını da zəiflədir. Xüsusən anemiya riski olanlar zərdəçalı çox istifadə edərkən diqqətli olmalıdırlar.
Həkimlər həmçinin hamilə və əmizdirən qadınlara, eləcə də qan durulaşdırıcılar, antasidlər və diabet dərmanları qəbul edənlərə zərdəçal əlavələrindən uzaq durmağı məsləhət görürlər. Ədviyyatın bəzən ağır metallar – xüsusən qurğuşun və arsenik – ilə çirklənməsi isə uşaqlar və qaraciyər-böyrək xəstələri üçün əlavə təhlükə yaradır.
