Böyük Britaniyanın ümumi praktiki həkimi Əmir Xan bildirib ki, 35 yaşdan yuxarı insanların sağlamlığı qoruması üçün bir neçə sadə və tamamilə pulsuz vərdiş kifayətdir.
E-saglam.az xəbər verir ki, o, bu tövsiyələri "Daily Mirror"a açıqlayıb.
Həkimin sözlərinə görə, səhər gəzintisi uzunömürlülüyün əsas açarlarından biridir. Günəş işığı sirkadiyalı ritmləri tənzimləyir, kortizol səviyyəsini aşağı salır, enerjini artırır və iştah hormonlarını sabitləşdirir.
Xanın paylaşdığı digər vacib məsləhət bədənin oksigenlə daha yaxşı təmin edilməsidir. Mütəxəssis yaş artdıqca toxumaların oksigendən səmərəli istifadə etmədiyini bildirərək gündəlik qısa, lakin intensiv fəaliyyətlər – məsələn, pilləkənləri sürətli çıxmaq və ya qısa müddət bir yoxuşa qalxmaq – tövsiyə edir. “Əsas odur ki, ürəyinizin 20-40 saniyə güclü işlədiyini hiss edəsiniz”, – həkim qeyd edib.
Əmir Xan həmçinin qan təzyiqinin mütəmadi yoxlanılmasını vacib hesab edir. Onun fikrincə, oynaqların və sümüklərin sağlam qalması üçün fiziki aktivlik qaçılmazdır.
Həkim gündəlik həyata daxil edilə biləcək son sadə vərdişi də açıqlayıb: dişləri bir ayaq üstə fırçalamaq. O, bunun yaşlandıqca tarazlığın qorunmasına ciddi töhfə verdiyini bildirib.
Tərcümə: Könül Oruc
