Yeni araşdırmalar göstərir ki, hər gün cəmi 30 dəqiqə az oturmaq bədənin enerji balansını dəyişdirə və maddələr mübadiləsini stimullaşdıra bilər.
E-saglam.az-ın məlumatına görə, mütəxəssislərin fikrincə, bu kiçik dəyişiklik yağ yandırılmasını artırır, enerjini yüksəldir və immunitet sistemini gücləndirir.
Alimlər bildirirlər ki, oturma müddətinin azaldılması bədənin həm yağ, həm də karbohidratları yanacaq kimi istifadə etmək qabiliyyətini artırır. Bu, “metabolik elastiklik” adlanan prosesdir və onun güclənməsi qan şəkəri balansını, insulin həssaslığını və çəki idarəsini yaxşılaşdırır. Əks halda, uzunmüddətli oturaq həyat tərzi bu sistemləri zəiflədir və ürək-damar xəstəlikləri riskini artırır.
Finlandiyanın Turku Universitetində aparılan tədqiqatda məlum olub ki, gündə 30–60 dəqiqə az oturan insanlar oturaq həyat tərzi keçirənlərə nisbətən daha yaxşı metabolik göstəricilərə malikdir.
Tədqiqatın müəllifi Dr. Taru Garthwaite bildirib:
“Telefonla danışarkən ayağa qalxmaq və ya qısa gəzintilər etmək kimi kiçik gündəlik dəyişikliklər belə metabolik sağlamlığı ciddi şəkildə dəstəkləyə bilər”.
Altı aylıq müşahidə nəticəsində, sadəcə oturma müddətini azaldan iştirakçılarda belə yağ yandırma və enerji çevrilməsi nəzərəçarpacaq dərəcədə yaxşılaşıb.
Mütəxəssislər xəbərdarlıq edir ki, oturaq həyat tərzi uzun müddətdə diabet və ürək xəstəliklərinin inkişaf riskini artırır. Lakin hər gün yarım saat az oturmaq bu riski azaltmaq üçün kifayət qədər təsirli addımdır.
Ümumdünya Səhiyyə Təşkilatının tövsiyəsinə əsasən, həftədə ən azı 150 dəqiqə — yəni gündə orta hesabla 20–30 dəqiqəlik orta intensivlikli fəaliyyət bədənin enerji balansını qorumağa kömək edir. Gəzinti, pilləkənlə qalxmaq və ya sadəcə iş arasında bir az hərəkət etmək belə sağlamlığa böyük fayda verir.
Tərcümə: Könül Oruc
