Flinders Universitetinin yeni araşdırmasına görə, gecələr parlaq işığa məruz qalmaq infarkt, insult və ürək çatışmazlığı riskini əhəmiyyətli dərəcədə artırır.
E-saglam.az xəbər verir ki, tədqiqat "JAMA Network Open"də dərc olunub və İngiltərədə təxminən 89 min insanın məlumatları əsasında aparılıb.
Araşdırmada biləklə geyilən sensorlardan istifadə edilərək iştirakçıların 13 milyon saatlıq işığa məruz qalması izlənilib. Nəticələr göstərib ki, gecə ən parlaq işığa məruz qalan insanlarda ürək çatışmazlığı riski 56%, infarkt riski isə 47% daha yüksəkdir. Risklər məşq, pəhriz, yuxu vərdişləri və genetika kimi digər amillər nəzərə alındıqdan sonra da qalır.
Tədqiqatçılar qeyd edirlər ki, qadınlar və gənclər gecə işığa qarşı xüsusilə həssasdır. Həmçinin, hətta yatmazdan əvvəl telefon, televizor və ya otaqdakı zəif işıq da bədən saatını poza bilər və ürək sağlamlığına mənfi təsir göstərə bilər.
Ekspertlər gecə işığa məruz qalmağı azaltmaq üçün qaranlıq pərdələrdən istifadə etməyi, işıqları söndürməyi və ekranlardan uzaq durmağı tövsiyə edirlər. Araşdırma vurğulayır ki, bədənimizin təbii yuxu ritmini qorumaq ürək xəstəliklərinin qarşısını almaqda vacibdir.
Tərcümə: Nəzrin Abbas
