Qida mütəxəssisləri xəbərdarlıq edirlər ki, uzunömürlü və istifadəyə hazır olan konservləşdirilmiş məhsullar, rahat və praktik görünməsinə baxmayaraq, sağlamlıq üçün ciddi risklər daşıya bilər.
E-saglam.az xəbər verir ki, mütəxəssislərin sözlərinə görə, konservlərin tərkibində duz, şəkər, qoruyucu maddələr və kimyəvi qatqılar normadan artıq olur. Bu maddələr uzun müddət orqanizmdə yığıldıqda qan təzyiqinin artması, mədə-bağırsaq pozğunluqları və böyrək problemləri yarada bilər.
Həmçinin, bəzi konserv qablarında istifadə edilən bisfenol-A (BPA) adlı maddə hormonal balansı poza və xərçəng riskini artırmaq potensialına malikdir.
Həkimlər bildirirlər ki, xüsusilə ət və balıq konservləri yüksək miqdarda yağ və duz ehtiva etdiyindən, ürək-damar xəstəlikləri və xolesterin səviyyəsinin artması kimi problemlərə səbəb ola bilər.
Qida təhlükəsizliyi üzrə mütəxəssislər tövsiyə edirlər ki, istehlakçılar mümkün qədər təzə və ya dondurulmuş məhsullara üstünlük versinlər, konservləşdirilmiş qidaları isə nadir hallarda və az miqdarda istifadə etsinlər.
Mütəxəssislərin yekdil fikrincə, düzgün qidalanma üçün təbii və az işlənmiş qidalar hər zaman ən sağlam seçim olaraq qalır.
Nəzrin Abbas
