Hər gün yeməklərimizlə birlikdə kiçik plastik hissəcikləri, yəni mikroplastikləri istehlak etdiyimizi düşünmək qəribə olsa da, bu, reallıqdır. Bu görünməz hissəciklər qida, su və havada demək olar ki, hər yerdə mövcuddur. Uzun müddət onların insan sağlamlığına təsiri məlum olmasa da, son araşdırmalar bu daimi məruz qalmanın ciddi problem yarada biləcəyini göstərir.
E-saglam.az xəbər verir ki, 2025-ci ilin fevralında aparılmış bir tədqiqat göstərdi ki, mikroplastiklər sadəcə bədəndən keçmir, əksinə yığılaraq sağlamlığa potensial zərər verə bilər. Bu, uzunmüddətli təsirlər barədə ciddi suallar doğurur, xüsusilə də onların ürək-damar xəstəlikləri, insult, toxuma iltihabı və digər sağlamlıq problemləri ilə əlaqəsi araşdırıldıqda.
Plastikin qaynaq mənbələrindən biri gözlənilməz yerdir: mətbəximiz. Yemək qabları, qida qablaşdırmaları və bəzi mətbəx ləvazimatları mikroplastiklərin əsas mənbəyidir. Yaxşı xəbər odur ki, sadə dəyişikliklərlə bu məruz qalmanı azalda bilərsiniz.
Mikroplastiklər insan bədənində toxuma iltihabı, hüceyrə ölümü və qaraciyər funksiyalarında problemlər yarada bilər. Heyvan və dəniz canlılarında isə oksidləşmə və DNA zədələnməsi, eləcə də xərçəng riski müşahidə edilmişdir. Siçanlar üzərində aparılan tədqiqatlar sperm sayının azalması, yumurtalıq zədələnməsi və irsi metabolik pozuntuların baş verdiyini göstərmişdir.
Dəqiq təsirləri hələ tam öyrənilməsə də, mövcud nəticələr ev mətbəxində istifadə etdiyimiz məhsulları yenidən nəzərdən keçirməyə səbəb olur.
Tərcümə: Nəzrin Abbas
E-saglam.az
