Mikroplastiklərin insan orqanizminə təsiri artıq elmi mühitdə ciddi müzakirə olunur, lakin onların hamiləlik və döl inkişafına necə təsir etdiyi barədə biliklərimiz hələ də çox məhduddur.
E-saglam.az xəbər verir ki, son illərdə aparılan araşdırmalar göstərib ki, mikroplastiklər və nanoplastiklər plasenta baryerini keçərək dölə çata bilər. Bu, körpənin ən həssas inkişaf dövründə orqan formalaşmasına mane olmaq, hüceyrə zədələnməsinə, oksidləşdirici stressə və hətta hormonların fəaliyyətinə təsir göstərmək kimi risklər yaradır.
Heyvan və laboratoriya təcrübələri də mikroplastiklərin beyində, qaraciyərdə, böyrəklərdə və ürəkdə toplanaraq öyrənmə, yaddaş və davranış pozuntularına səbəb ola biləcəyini göstərir. Plasentada və döl toxumalarında müşahidə olunan dəyişikliklər körpənin gələcəkdə şəkərli diabet, hipertoniya və ürək xəstəliklərinə meylli olma ehtimalını artırır.
Buna baxmayaraq, hamilə qadınlarda aparılmış birbaşa sübutlar hələ də azdır. Mikroplastiklərin orqanizmə hansı yollarla daxil olduğu, hansı miqdarda toplandığı və necə xaric edildiyi tam aydın deyil.
Mütəxəssislərin fikrincə, bu sahədə daha geniş və dərin araşdırmalara təcili ehtiyac var. Çünki mikroplastiklərin real təsirlərini anlamaq həm qlobal plastik istehsalı və tullantı idarəçiliyi siyasətini formalaşdırmaq, həm də hamilə qadınlara daha dəqiq tibbi məsləhətlər vermək üçün həyati əhəmiyyət daşıyır.
Tərcümə: Könül Oruc
