Ginekoloq Olqa Kaplina bildirib ki, qadınlarda üz tüklərinin — xüsusilə bığın yaranması hormonal pozğunluqlarla bağlı ola bilər.
E-saglam.az xəbər verir ki, o, bu barədə YouTube kanalında danışıb və qadınları bu əlaməti sadəcə estetik problem kimi qəbul etməməyə çağırıb.
Kaplinanın sözlərinə görə, bu kimi hallarda ilk olaraq həkimə müraciət edilməlidir. "Adət dövrünün 3-5-ci günləri arasında pulsuz androgen indeksi və testosteron səviyyəsi yoxlanmalıdır", – deyə o bildirib.
Əgər bu göstəricilər normadan yüksəkdirsə, qadına hiperandrogenizm diaqnozu qoyula bilər. Həkim əlavə edib ki, əgər nəticələr normal çıxsa, həmin günlərdə 17-OH-progesteron testi də aparılmalıdır.
Kaplina bığdan əlavə aşağıdakı simptomlara da diqqət yetirməyi tövsiyə edir:
-
Qarın nahiyəsində piylənmə
-
Ümumi vəziyyətin pisləşməsi
-
Emosional gərginlik və ya təcavüzkarlıq
-
Qeyri-müntəzəm menstrual dövr
Həkim vurğulayıb ki, görünüşdəki dəyişikliklər bəzən daha ciddi sağlamlıq problemlərinin xəbərçisi ola bilər və vaxtında müayinədən keçmək vacibdir.
Tərcümə: Könül Oruc
