Hər birimizin bağırsaqlarında unikal bakteriya qarışığı mövcuddur və son tədqiqatlar göstərir ki, bu mikrobiom metabolik sağlamlığımıza əhəmiyyətli təsir göstərə bilər.
E-saglam.az xəbər verir ki, Yeni Zelandiyada Oklend Universiteti tərəfindən aparılan araşdırmada, obez gənclərə sağlam bağırsaq bakteriyaları olan nəcis nəqli (FMT) kapsulları verilib və nəticədə metabolik sağlamlıq bir neçə il ərzində yaxşılaşıb.
Metabolik sağlamlıq, bədənin qidanı enerji mənbəyinə çevirmə qabiliyyətini əhatə edir və yüksək qan təzyiqi, qanda yüksək şəkər və yağ səviyyəsi, bel ətrafı ölçü və xolesterin kimi amilləri əhatə edən metabolik sindromla ölçülür. Araşdırmada iştirakçılara tək FMT müalicəsi tətbiq edilib və nəticədə metabolik sindrom riskində əhəmiyyətli azalma müşahidə olunub. Pediatrik endokrinoloq Ueyn Katfild bildirir ki, metabolik sindrom ürək xəstəliyi və insultdan ölüm riskini iki dəfə, 2-ci tip diabet riskini isə beş dəfə artırır.
Transplantasiya kilo itkisinə birbaşa təsir etməsə də, bədən yağının azaldılması və metabolik sindrom skorlarının yaxşılaşması kimi faydalar müşahidə olunub. Dörd il sonra aparılan təqib testləri göstərdi ki, köçürülmüş bakteriyalar hələ də müəyyən dərəcədə bədəndə mövcuddur və davamlı müalicə həmişə tələb olunmaya bilər.
Araşdırma piylənmə ilə bağırsaq bakteriyaları arasında ikitərəfli əlaqəni göstərir: yediklərimiz bağırsaq mikrobiomuna təsir göstərir, eyni zamanda mikrobiom maddələr mübadiləsini və çəkini müəyyən dərəcədə tənzimləyir. FMT-nin öz riskləri olsa da, digər tədqiqatlar onun xərçəng, beyin xəstəlikləri və yaşlanma ilə mübarizədə faydalı ola biləcəyini göstərir.
Gələcəkdə tədqiqatçılar daha böyük insan qrupları üzərində FMT-nin təsirlərini öyrənməyi və metabolik sağlamlığı təşviq edə biləcək spesifik bağırsaq mikroblarını müəyyən etməyi planlaşdırır. O'Sullivan qeyd edir: "Mikrobiomunuzu qabaqcadan proqramlaşdıraraq bəzi xəstəliklərin riskini azalda bilərsiniz. Bu, mikrobiom vasitəsilə xüsusi şərtləri hədəf alan yeni nəsil probiyotiklərin inkişafına yol açır".
Araşdırma Nature Communications jurnalında dərc olunub.
Tərcümə: Könül Oruc
