ABŞ-nin Viskonsin Universitetinin alimləri matris RNT (mRNT) ilə aktivləşdirilmiş terapevtik trombların istifadəsi ilə osteoartritin perspektivli müalicə metodunu hazırlayıblar.
E-saglam.az “Report”a istinadən xəbər verir ki, tədqiqat “Bioactive Materials” (BAM) elmi jurnalında dərc edilib.
Osteoartrit artritin ən geniş yayılmış formasıdır. O, diz və bud oynaqlarında qığırdağın dağılması nəticəsində yaranır və ağrı, habelə hərəkət məhdudluğuna səbəb olur.
Yeni metod mRNT-nin çatdırılması üçün mineral örtüklü mikrozərrəciklərin istifadəsinə əsaslanır. Bu elementlər qığırdağın formalaşmasını dəstəkləyən zülalın hasil olunmasını kodlaşdırır.
Komanda xəstənin maye sümük iliyini və periferik qan nümunələrini götürərək onları mikrozərrəciklərlə qarışdırıb və qan laxtası yaradıb. Daha sonra mRNT ilə aktivləşdirilmiş trombu zədələnmiş yerə çatdırıblar.
Metod dovşanlar üzərində aparılan sınaqlarda effektivliyini göstərib. Alimlər strategiyanı daha böyük heyvanlarda yoxlamağı və daha sonra insanlar üzərində klinik testlərə başlamağı planlaşdırırlar.
Tədqiqatçılar hesab edirlər ki, eyni yanaşmanı skelet əzələlərinin və sümüklərin böyük zədələrinin müalicəsində də istifadə etmək olar.
