Ağızda ortaya çıxan kiçik bir yara və ya görməməzlikdən gəlinmiş diş ağrısı düşündüyünüzdən daha ciddi sağlamlıq problemlərinin xəbərçisi ola bilər.
E-saglam.az xəbər verir ki, Mərmərə Universitetinin professorları bu sahədə mühüm açıqlamalar verərək ağız sağlamlığının ümumi bədən sağlamlığına təsirinə diqqət çəkiblər.
Prof. Dr. Gökhan Göçmen bildirir ki, ağız içindəki dəyişikliklər bəzən ciddi xəstəliklərin ilk əlaməti ola bilər. Son illərdə ağız xərçəngi hallarının artması bu sahəyə xüsusi diqqət tələb edir. Diş həkimləri erkən mərhələdə bu xəstəliyi müəyyən edə bilər və vaxtında müdaxilə ilə xəstənin həyat keyfiyyəti qoruna bilər. Göçmen həmçinin vurğulayır ki, ağızdakı uzun müddətli yaralar, şişliklər və irinli axıntılar diqqətdən kənarda qalmamalı, mütləq diaqnoz üçün nümunə götürülməlidir.
Protez Diş Həkimliyi üzrə professor Dr. Yılmaz Umut Aslan isə ağız gigiyenasının vacibliyini önə çəkərək bildirir ki, diş çürüməsi dünyada qripdən sonra ikinci ən çox görülən xəstəlikdir. Avropada diş həkiminə müraciət tezliyi Türkiyə ilə müqayisədə beş qat daha çoxdur. Almaniyada demək olar ki, hər kəs gündə iki dəfə dişlərini fırçalayırsa, Türkiyədə bu rəqəm hər beş nəfərdən biri səviyyəsindədir. Bu fərq birbaşa diş sağlamlığına və onunla bağlı yaranan problemlərə təsir göstərir.
Aslan əlavə edir ki, yaşlı əhali arasında ağız sağlamlığının zəifləməsi onların düzgün qidalanmasını və dərman istifadəsini çətinləşdirir. Sağlam bədən sağlam qidalanma ilə başlayır, onun təməli isə ağız sağlamlığıdır. Rəqəmsal stomatologiyanın inkişafı sayəsində artıq bir gün ərzində diş protezləri hazırlanaraq xəstəyə təqdim oluna bilir. Bu, müalicə prosesini xeyli sürətləndirir və rahatlaşdırır.
Periodontologiya üzrə dosent Dr. Hatice Selin Güngörmek isə ağız gigiyenasında diş fırçalama, diş ipindən və diş arası fırçalardan istifadə, əlavə olaraq ağız qarqaralarının dəstəkləyici rol oynadığını bildirir. O, valideynləri uşaqlarına ağız gigiyenasını öyrətməyə, diş fırçalamağı sevdirərək onları bu vərdişə erkən yaşda alışdırmağa çağırır.
Ümumi fikir aydındır: ağız sağlamlığı yalnız dişlərlə məhdudlaşmır – o, bütün bədənin sağlamlığı üçün əsas qapıdır. Diş həkiminə vaxtında müraciət, düzgün gigiyena və mütəmadi qulluq həyat keyfiyyətini qorumağın açarıdır.
Tərcümə: Könül Oruc
