Qaraciyər bədənimizdə bir çox funksiyalar üzrə cavabdeh olan çox əhəmiyyətli bir orqandır. Qaraciyərdə bir zədə meydana gələndə bədənimiz müxtəlif işarələr verir. Bədənin yuxarı hissəsində, bel, kürəkdə qaşınma qaraciyər problemlərindən xəbər verə bilər.
E-saglam.az xəbər verir ki, bu barədə terapevt-hepatoloq Tofiq Əkbərov məlumat verib.
Həkimin sözlərinə görə, qaraciyər çatışmazlığı olduqda filtr prosesi işləmir, qana toksiki maddələr keçir. Qanda arzuolunmaz maddələr artanda birinci reaksiyanı dəri göstərir. Nəticədə qaşınma başlayır.
Tofiq Əkbərov bildirib ki, qaraciyər orqanizmin əsas fabrikidir. O, pis işlədikdə, qalıqlar, toksinlər qanda toplaşır. Əgər qaşınma nəzarətə alınmazsa, dırnaqlar dərinin tamlığını pozub neyrodermitə səbəb ola bilir. Qıcıqlanmış dəridə infeksiya və ayrıca dəri xəstəlikləri yaranır. Bu isə, xəstəyə əlavə problemdir.
