Yeni bir araşdırma ilə bəlli olub ki, sadəcə bir saat ərzində saqqız çeynəmək insan tüpürcəklərində 250 min mikroplastik hissəcik buraxa bilər. Şimali İrlandiyadakı "Queens" Universiteti tərəfindən aparılan və "Journal of Hazarous Materials" jurnalında dərc edilən araşdırma, saqqızın potensial zərərli maddələrin bədənə daxil olmasına səbəb ola biləcəyini ortaya çıxarıb.
E-saglam.az xəbər verir ki, mikroplastiklər daha böyük plastik məhsulların parçalanması nəticəsində yaranan kiçik plastik hissəciklərdir.
Onlar sintetik parçalardan mikrofiberlər kimi mənbələrdən yayılır. Araşdırmada mikroplastiklərin zamanla daha kiçik parçalara parçalanaraq nanoplastikaya çevrildiyi və bunun tüpürcəkdə də təsbit edildiyi bildirilib.
Saqqız çeynəmə plastik məruz qalma mənbəyi ola bilər
Tədqiqatın müəlliflərindən biri və "Queens" Universitetinin Qlobal Qida Təhlükəsizliyi İnstitutundan olan Cuong Cao plastik çirklənmənin qlobal bir problem olduğuna diqqət çəkib. O, qeyd edib: "Araşdırmamız bu plastikləri aşkar etmək üçün təsirli və əlçatan bir üsul təqdim edir, eyni zamanda saqqız kimi diqqətdən kənarda qalan məruz qalma mənbələrini də ortaya qoyur".
Dr. Cao, tapıntıların mikro və nano plastiklərin aşkarlanmasında əhəmiyyətli bir boşluğu doldurduğunu ifadə edərək, saqqızın plastikə məruz qalmasına səbəb ola biləcək bilinməyən bir faktor olduğunu vurğulayıb.
Təhlükəsiz çeynəmə vaxtı...
Tədqiqatda tüpürcəyə nə qədər mikroplastik keçdiyini ölçmək üçün avtomatik "Raman spektroskopiyası" adlı texnika istifadə edilib. Tədqiqatçılar mikro və nano plastiklərin bədənə müxtəlif yollarla daxil ola biləcəyini və həzm sistemi, ağciyərlər və reproduktiv sistemə zərər verə biləcəyini bildiriblər.
Tədqiqata qatılan "Queens" Universitetinin doktorantı Udit Pant analiz edilən tüpürcək nümunələrinin üç fərqli zaman aralığında toplandığını bildirib:
0-20 dəqiqə
20-40 dəqiqə
40-60 dəqiqə
Pant qeyd edib: "Təəccüblüdür ki, bütün nümunələrdə mikro və nano plastiklər tapıldı, bu, saqqız çeynəməyin təhlükəsiz olub-olmaması ilə bağlı heç bir məhdudiyyətin olmadığını göstərir".
Elm adamları bu cür hissəciklərin insan sağlamlığına uzunmüddətli təsirlərinin bilinmədiyini vurğulasa da, araşdırmada istifadə edilən metodun plastik çirklənməni azaltmağa kömək edə biləcək daha sərfəli bir vasitə təqdim edə biləcəyini ifadə etdilər.
Tərcümə: Yeganə
