Ürəyi qidalandıran koronar damarlarda əmələ gələn yağ lövhələri zaman keçdikcə parçalandıqda və bu qırılmalardan laxtalar yığılaraq arteriyanın tıxanmasına səbəb olduqda infarkt baş verir. Sürətlə inkişaf edən bu vəziyyətə vaxtında müdaxilə edilmədikdə ölümcül nəticələrə səbəb ola bilər.
E-saglam.az xəbər verir ki, Liv Hospitalın Kardiologiya Mütəxəssisi Prof. Dr. Alp Burak Çatakoğlu infarkt riskini azaltmaq və sağlam ürək damarlarına sahib olmaq üçün alınması lazım olan tədbirləri izah etdi.
İnfarktın əlamətləri və erkən müdaxilə tövsiyələri
İnfarktın ən çox görülən simptomları sinə içində təzyiq və ağrı hissidir. Bu cür əlamətlər hiss edildiyində dərhal həkimə müraciət edilməsi lazım olduğunu vurğulayan Prof.Dr.Çatakoğlu, düzgün diaqnozun və sürətli müdaxilənin əhəmiyyətinə diqqət çəkir. Təsdiqlənmiş infarkt halında təcili koronar angioqrafiya bloklanmış damarların açılması üçün həyati xilasedici addım olacaqdır.
Ürək sağlamlığını qorumaq üçün müntəzəm fiziki fəaliyyət son dərəcə vacibdir. Prof. Dr. Çatakoğlu həftənin beş günü yarım saatlıq gəzintilərin ürək-damar sisteminizin sağlamlığını qoruya biləcəyini ifadə edir. Tədqiqatlar göstərir ki, ürək xəstəliyi riskini azaltmaq üçün həftədə cəmi iki saat yarım fiziki fəaliyyət kifayətdir. Gəzinti, velosiped sürmə və ya üzgüçülük kimi məşqlər damarlarda yağ yığılmasının qarşısını alır və ürək sağlamlığını yaxşılaşdırır.
Özünüzü ürək xəstəliklərindən qorumağın başqa bir mühüm yolu düzgün qidalanmadır. Prof. Dr. Çatakoğlu, ürək sağlamlığı üçün hər gün ən az bir porsiya tərəvəz istehlakının vacib olduğunu bildirir. Müasir həyatda fast-food istehlakı ilə əlaqəli həddindən artıq kalori qəbulu və qeyri-sağlam pəhriz ürək xəstəliklərinə səbəb olur. Pəhrizdə tərəvəzlərin mərkəzi olması ürək-damar sisteminin sağlamlığını qorumağa kömək edir.
Siqaret infarkt riskini artıran ən əhəmiyyətli faktorlardan biridir. Prof. Dr. Çatakoğlu siqaret çəkən fərdlərin infarktdan ölmə ehtimalının siqaret çəkməyənlərə nisbətən 2-3 qat daha çox olduğunu ifadə edir. Ancaq siqareti dayandırdıqda, bir il ərzində infarkt keçirmə riski əhəmiyyətli dərəcədə azalır. Ürək sağlamlığının qorunmasında siqaret çəkməməyin böyük əhəmiyyəti olduğu bir daha vurğulanır.
Yüksək qan təzyiqi ürək xəstəlikləri və infarkt riskini artıran digər mühüm faktordur. Xüsusilə 50 yaşdan yuxarı insanlarda rast gəlinən yüksək təzyiq ürək sağlamlığını təhdid edən bir vəziyyətdir. Prof. Dr. Çatakoğlu, təzyiqi nəzarət altında saxlamağın ürək xəstəliklərinin qarşısının alınmasında mühüm rol oynadığını bildirir. Gündəlik duz istehlakının azaldılması və müntəzəm olaraq qan təzyiqinin ölçülməsi ürək xəstəliklərinin qarşısının alınmasında təsirli tədbirlər kimi önə çıxır.
Ürək damarlarında yağ lövhələrinin əmələ gəlməsinə səbəb olan bir çox faktor var.
Prof.Dr.Çatakoğlu siqaret, diabet, yüksək xolesterin, hipertoniya, genetik meyl, oturaq həyat tərzi və qeyri-sağlam qidalanmanın bu amillər arasında olduğunu açıqlayır. Bu risk faktorlarına nəzarət etmək əksər ürək xəstəliklərinin qarşısını ala bilər. Bu risklər uyğun həyat tərzi dəyişiklikləri, sağlam qidalanma və müntəzəm idmanla minimuma endirilə bilər.
Tərcümə: Könül Oruc
