Böyrəklər bədəndən tullantıların atılmasını təmin edir. Lakin bəzi qidalar böyrək daşlarının əmələ gəlməsinə səbəb ola bilər. Böyrək daşları, keçməsi doğum qədər çətin bir prosesdir.
E-saglam.az xəbər verir ki, urologiya mütəxəssisi Op. Dr. Əli Murat Gökçə, böyrək daşlarının səbəbləri və qarşısını alma üsulları barədə məlumat verib.
Böyrək daşı necə əmələ gəlir?
Böyrək daşları, qanda çox olan maddələrin, böyrəklərdən süzüldükdən sonra sidikdə kristallaşması nəticəsində yaranır. Kalsium, oksalat və sidik turşusunun kristallaşması, birləşərək daş əmələ gətirir. Böyrəkdən çıxan daşlar, sidik yollarını tıxayaraq ağrıya səbəb ola bilər.
Böyrək daşının əlamətləri
Böyrək daşının ən geniş yayılmış əlaməti qarın nahiyəsində ağrıdır. Daş böyrəyi tərk etdikdə, ağrı daha intensiv ola bilər. Əgər daş sidik yollarını tıxayırsa, ağrı şiddətlənir.
Böyrək daşlarınının qarşısını almaq üçün tövsiyələr
Op. Dr. Əli Murat Gökçə, böyrək daşlarının qarşısını almaq üçün bəzi sadə addımlar təklif edir:
Bol maye içmək: Gündə 2,5 litr maye içmək, böyrək daşlarının yaranmasını əngəlləyir. Limonad, portağal suyu və qreypfrut suyu da faydalıdır.
Meyvə və tərəvəzlər: Limon və portağal sidiyin turşuluğunu azaldır, bu da böyrək daşlarının qarşısını alır. Ayrıca, yüksək lif tərkibli qidalar, məsələn, balqabaq və alma böyrəyin filtrasiya sistemini dəstəkləyir.
Probiotiklər: Qatıq və digər probiotik qidalar böyrəklər üçün faydalıdır.
Böyrək daşlarının yaranma riskini azaldan bu sadə həyat tərzi dəyişiklikləri ilə böyrək sağlamlığınızı qoruyun.
Tərcümə: Könül Oruc
