Şəkərlə şirinləşdirilmiş içkilər, ürək xəstəlikləri, tip 2 diabet və xərçəng kimi ciddi sağlamlıq problemlərini tətikləyir. Bu içkilərin tərkibindəki yüksək miqdarda şəkər çəki artımına, piylənməyə və digər metabolik xəstəliklərə səbəb olur.
E-saglam.az xəbər verir ki, hər il bu içkilərin istehlakı nəticəsində 330 mindən çox insan həyatını itirir.
Sağlamlığa təsirləri
Ürək-damar xəstəlikləri: Həddindən artıq şəkər istehlakı damarların iltihabına səbəb olaraq ürək xəstəlikləri riskini artırır.
Çəki artımı və piylənmə: Yüksək kalorili olan bu içkilər qida dəyəri vermir, nəticədə çəki artımı və piylənməyə gətirib çıxarır.
Diş sağlamlığı: Şəkər dişlərin çürüməsinə və aşınmasına səbəb olur.
Tip 2 diabet: Şəkərli içkilərin müntəzəm istehlakı diabet riskini əhəmiyyətli dərəcədə artırır.
Xərçəng riski: Müəyyən xərçəng növlərinin riskini yüksəldir.
Bundan əlavə, şəkərli içkilər böyrək xəstəlikləri, alkoqolsuz yağlı qaraciyər xəstəliyi və podaqra kimi problemlərlə də əlaqələndirilir.
Alternativlər:
Şəkərli içkiləri həyatınızdan çıxarmaq və daha sağlam seçimlərə yönəlmək üçün aşağıdakı alternativləri nəzərdən keçirə bilərsiniz:
Adi su: Ən sağlam içkidir. Dadını artırmaq üçün limon, xiyar və ya meyvə dilimləri əlavə edə bilərsiniz.
Şəkərsiz çaylar: Qara, yaşıl və bitki çaylarını seçərək, həm dadlı, həm də faydalı bir içki əldə edə bilərsiniz.
Mineral su: Təzə sitrus suyu və ya meyvə dilimləri əlavə edərək sağlam bir içki hazırlayın.
Meyvə ilə ətirli su: Limon, nanə, çiyələk və ya digər meyvələr əlavə edərək dadlı və şəkərsiz bir seçim edə bilərsiniz.
Hind qozu suyu: Təbii şirin və elektrolitlərlə zəngin olan bu içki bədəninizi enerji ilə təmin edir.
Belə ki, şəkərli içkilərin istehlakını azaltmaq həm fərdi sağlamlıq, həm də ümumi cəmiyyət üçün böyük faydalar təmin edir. Bu içkilərdən imtina edərək ürək xəstəlikləri, diabet və xərçəng riskini əhəmiyyətli dərəcədə azalda bilərsiniz. Sağlam alternativlərə üstünlük vermək, uzunmüddətli sağlam həyatın açarıdır.
Tərcümə: Könül Oruc
