Yeni Klinikanın ürək-damar cərrahiyyəsi komandası tərəfindən ilk dəfə eyni anda üç əməliyyat icra olunub
Bu barədə E-saglam.az-a TƏBİB-dən məlumat verilib.
Bildirilib ki, Yeni Klinikada ilk dəfə eyni anda üç əməliyyat - aorta qapaq protezlənməsi, aorta kök protezlənməsi və qalxan aorta protezlənməsi icra olunub. Tibdə “Bentall-De Bono” adı verilən cərrahi əməliyyat uğurla icra edilib.
Təngnəfəslik şikayətləri ilə müraciət edən 1964-cü il təvəllüdlü kişi xəstədə aparılmış müayinələr zamanı aorta qapaq çatışmazlığı, aorta kök anevrizması və qalxan aorta anevrizması aşkarlanıb.
Ürək-damar cərrahı Mətin Hadizadə tərəfindən icra olunan əməliyyat zamanı aorta qapağı dəyişdirilib, qalxan aorta və aortanın kök hissəsi rezeksiya olunub, anevrizma ləğv edilərək koronar butonlar hazırlanıb. Həmçinin dakron protezlə aortanın kökü və qalxan aorta bərpa olunaraq koronar butonlar yeni aortaya tikilib.
5 saata yaxın icra olunan əməliyyatdan sonra xəstə bir gün Reanimasiya şöbəsində təqib edildikdən sonra 5 günlük stasionar müalicəyə cəlb olunub. Daha sonra o, ambulator müalicə üçün evə buraxılıb.
Qeyd edək ki, ürək-damar cərrahiyyəsi və anesteziologiya-reanimasiya komandası tərəfindən uğurla həyata keçirilən “Bentall-De Bono” əməliyyatı TƏBİB-in tabeli tibb müəssisələri arasında icbari tibbi sığortanın Xidmətlər Zərfi daxilində ilk dəfə Yeni Klinikada icra olunub.
