Xolesterol səviyyənizi idarə etmək düşündüyünüz qədər çətin deyil — xüsusilə də düzgün qidaları seçdikdə.
E-saglam.az xəbər verir ki, hər gün bir ovuc qoz-fındıq və toxum yemək yalnız LDL (pis xolesterol) səviyyələrini azaltmaqla qalmır, həm də iltihabla mübarizə apararaq ümumi ürək sağlamlığınızı gücləndirə bilər. Bu super qidalar lif, doymamış yağlar və antioksidantlarla zəngindir. Aşağıda xolesterol salıcı təsiri ilə seçilən ən faydalı qoz-fındıq və toxumlarla tanış olun:
1. Badam
Badam zəngin vitamin, antioksidant və doymamış yağ turşuları mənbəyidir. Pis xolesterolun (LDL) səviyyəsini azaldaraq yaxşı xolesterolu (HDL) artırmağa kömək edir. Eyni zamanda lif, fitosterollar və bitki mənşəli zülallarla zəngindir. İsladılmış badam isə qidaların daha yaxşı mənimsənilməsini təmin edir.
2. Qoz
Qoz, ürək-damar xəstəlikləri və 2-ci tip diabet kimi metabolik sindromlarla mübarizədə təsirli qidadır. Araşdırmalara görə, mütəmadi olaraq qoz yeyən insanlarda LDL xolesterol səviyyəsi aşağı, ümumi pəhriz keyfiyyəti isə daha yüksək olur.
3. Fındıq
Fındıq omeqa-3 yağ turşuları və antioksidantlarla doludur. Bu maddələr oksidləşdirici stressi və iltihabı azaldaraq qan təzyiqini tənzimləyir. Fenolik birləşmələr isə xolesterolun düşməsində və xərçəng riskinin azalmasında mühüm rol oynayır.
4. Çia toxumları
Çia toxumları həll olunan lif və omeqa-3 yağ turşuları baxımından çox zəngindir. Bu xüsusiyyətləri ilə pis xolesterolu aşağı salır və ürək sağlamlığını dəstəkləyir. Smoothie-lərdən tutmuş bişmiş məmulatlara qədər hər şeyə əlavə etmək mümkündür.
5. Günəbaxan tumları
Fitosterollarla zəngin olan günəbaxan tumları bağırsaqlarda xolesterolun udulmasını azaldır. Eyni zamanda E vitamini ilə antioksidant qoruma təmin edərək damar sağlamlığını qoruyur. Salatlara, qatığa və ya qəlyanaltı kimi istifadəsi idealdır.
6. Fıstıq
Botanik baxımından paxlalı olsa da, fıstıqlar ağac qoz-fındıqlarına bənzər sağlamlıq faydalarına malikdir. Onlar LDL-ni azaldaraq HDL-ni qoruyur və ürək sağlamlığını gücləndirir. Tədqiqatlara görə, orta yağlı pəhrizlərə fıstıq əlavə edilməsi xolesterol səviyyəsini əhəmiyyətli dərəcədə azaldır.
Tərcümə: Könül Oruc
