Yeniyetmələrin sağlam qidalanması üçün gündəlik qida rasionunda dörd qrup məhsuldan aşağıdakı təxmini miqdarlarda istifadə etmək lazımdır.
Bu barədə E-saglam.az-a uşaq endokrinoloqu Uzman Dr. Azad Əkbərzadə açıqlama verib.
Süd və süd məhsulları: gündəlik 3-4 hissə yeyilməlidir. Süd məhsulları üçün 1 hissə;
1 su stəkanı süd və ya qatıq
2 ədəd kibrit qutusu böyüklüyündə pendir
1 kiçik kasa manna sıyığı, yulaf sıyığı, südlü aş və s. nəzərdə tutulur.
Ət və ət məhsulları, yumurta, paxlalı bitkilər və qozkimilər (paxla, mərci, noxud, qoz, fındıq və s): gündəlik 3-4 hissə yeyilməlidir. Bu qrup qidalar üçün 1 hissə;
60-90 qr ət (təxminən 2-3 kotlet böyüklüyündə)
8-10 yemək qaşığı bişmiş paxla, lobya və s.
2 yumurta və s. nəzərdə tutulur.
Meyvə-tərəvəz məhsulları: gündəlik 4-5 hissə yeyilməlidir. Meyvə-tərəvəz məhsuları üçün 1 hissə;
1 ədəd orta böyüklükdə portağal, alma, banan həcmindəki meyvələr
3-6 ədəd ərik, alça, göyəm həcmindəki meyvələr
10-15 ədəd çiyələk, gilas, albalı həcmindəki meyvələr
2-3 stəkan qədər doğranmış göyərti
1 ədəd orta böyüklükdə kartof, yerkökü və s. nəzərdə tutulur.
Çörək və digər taxıl məhsulları: gündəlik 3-6 hissə yeyilməlidir. Taxıl məhsulları üçün 1 hissə;
1 ədəd orta dilim çörək (50 qr)
1 su stəkanı qədər bişmiş düyü, makaron, bulqur və s. (6-8 yemək qaşığı və ya 120-150 qr)
1 orta böyüklükdə qutab, blinçik, qoğal və s. nəzərdə tutulur.
Könül Oruc
