E-saglam.az xəbər verir ki, hemofiliya genetik, yəni anadangəlmə qan laxtalanma pozuntusudur və erkən diaqnozla idarəolunan xəstəlikdir.
Dr. Yılmaz qeyd edir ki, diz və dirsək kimi oynaqlarda tez-tez ağrı və şişlik yaşayan uşaqlar mütləq bu baxımdan qiymətləndirilməlidir. Hemofiliyanın əsas növləri A və B-dir. A növü VIII, B növü isə IX laxtalanma faktorunun çatışmazlığı ilə yaranır.
Diaqnoz yalnız simptomlara deyil, laborator analizlərə əsasən qoyulur. Ailədə hemofiliya varsa və körpədə göbək kəsildikdən sonra qanaxma və ya sünnət sonrası uzunmüddətli qanaxma müşahidə olunursa, bu ciddi siqnaldır.
Hemofiliya təkcə fiziki sağlamlıq problemi deyil. Uşağın sosial həyatı, məktəbə uyğunlaşması və psixoloji vəziyyəti də təsirlənə bilər. Bu səbəblə ailələrin də düzgün şəkildə maarifləndirilməsi vacibdir.
Dr. Yılmaz əlavə edir ki, bu gün hemofiliya yalnız qanaxma zamanı deyil, profilaktik müalicələrlə də idarə olunur. Müəyyən aralıqlarla verilən laxtalanma faktorları sayəsində qanaxmaların qarşısı alına bilir. Uzunmüddətli dərmanlar və gen terapiyası sahəsində irəliləyişlər də ümidvericidir.
İdmanın tamamilə qadağan olunmadığını deyən həkim, təmassız idman növlərinin – xüsusilə üzgüçülüyün – tövsiyə edildiyini bildirib. Eyni zamanda cəmiyyətdə maarifləndirmənin yalnız bir günlə məhdudlaşmaması, hemofiliyanın tanıdılması və başa düşülməsi üçün davamlı səylər göstərilməsinin vacibliyini vurğulayıb.
Tərcümə: Könül Oruc
