Dünyada şəkərli diabet xəstələrinin sayı günü-gündən artır. Müalicə olunmayan diabet sinirlərin zədələnməsi, ürək və böyrək xəstəlikləri, görmə itkisi və əzaların itirilməsi kimi ciddi fəsadlara səbəb ola bilər.
E-saglam.az xəbər verir ki, diabetin həyat tərzi dəyişikliyi və dərmanlarla idarə oluna biləcəyini xatırladan Anadolu Sağlamlıq Mərkəzi Xəstəxanası Kardiologiya Mütəxəssisi Prof. Dr. Nevrez Köylan xəstələrə diabetin mənfi təsirlərini azaltmaqla bağlı tövsiyə verib.
Diabetin mənfi təsirlərini azaltmağın 11 yolu
Qan şəkərinizin səviyyəsini nəzarət altında saxlayın
Həkiminizin hədəf qan şəkəri diapazonunu təyin etməsinə icazə verin və bu diapazonu saxlamaq üçün çalışın. Qan şəkərinizi mütəmadi olaraq yoxlayın və lazım olduqda diabet dərmanlarınızı qəbul edin.
Sağlam qidalanın
Diabetə uyğun qidalanma planı qan şəkərinizin səviyyəsini nəzarət altında saxlamağa və sağlam çəki saxlamağa kömək edir. Kifayət qədər miqdarda meyvə, tərəvəz və tam taxıllı qidalardan istifadə etməyə diqqət edin. Yağlı və işlənmiş qidalardan uzaq durun.
Müntəzəm olaraq məşq edin
Həftədə ən azı 150 dəqiqə orta dərəcədə məşq etməyi hədəfləyin. Daimi idman, qan şəkərinin səviyyəsini azaltmağa, arıqlamağa və ümumi sağlamlığınızı yaxşılaşdırmağa kömək edir.
Siqaretdən uzaq durun
Siqaret çəkmək diabetin ağırlaşma riskini əhəmiyyətli dərəcədə artırır. Siqareti tərgitmək üçün siqareti buraxma proqramına qoşulun və ya həkiminizlə danışın.
Mütəmadi olaraq həkim müayinələrini aparın
Həkiminiz diabetin ağırlaşmalarını erkən aşkar etmək və müalicə etmək üçün sizi mütəmadi olaraq yoxlayacaq. Göz və ayaq müayinələri və böyrək funksiyası testləri kimi müayinələrə qatılın.
Qan təzyiqinizi nəzarət altında saxlayın
Yüksək qan təzyiqi diabet riskini artırır. Qan təzyiqinizi 130/80 mmHg-dən aşağı tutmağı hədəfləyin.
Xolesterol səviyyənizi diqqətlə izləyin
Yüksək xolesterol səviyyəsi ürək xəstəliyi riskini artırır. LDL (pis) xolesterolunuzu 100 mq/dL-dən aşağı, HDL (yaxşı) xolesterolunuzu isə 40 mq/dL-dən yuxarı tutmağı hədəfləyin.
Ayaq sağlamlığına diqqət yetirin
Diabet sinirlərin zədələnməsinə və ayaqlarda qan dövranının pisləşməsinə səbəb ola bilər. Hər gün ayaqlarınızı yoxlayın və hər hansı kəsiklər, yaralar və ya şişliklər barədə dərhal həkiminizə məlumat verin.
Həyatınızdakı stressi idarə edin
Stress qan şəkərinin səviyyəsini artıra bilər, buna görə də onu nəzarət altında saxlamaq lazımdır. İdman, yoqa və ya meditasiya kimi sağlam, sakitləşdirici üsulları sınayın.
Dişlərinizi mütəmadi olaraq fırçalayın və diş ipi istifadə edin
Diabet diş əti xəstəliyi riskini artırır. Dişlərinizi gündə iki dəfə fırçalamağınızdan və hər gün diş ipindən istifadə etdiyinizdən əmin olun.
Həkiminizlə müntəzəm əlaqə saxlayın
Şəkərli diabetinizi idarə etmək üçün hər hansı bir sualınız və ya narahatlığınız varsa, həkiminizlə danışmaqdan çəkinməyin.
Tərcümə: Könül Oruc
