Bitkilərlə müalicə sahəsində tanınmış həkim Füzuli Hüseynov onun adından saxta sayt və səhifələrin yaradıldığını, foto və videolarının icazəsiz istifadə edildiyini bildirib.
E-saglam.az bildirir ki, o, xəbərdarlıq edərək izləyicilərini bu cür yalan məlumatlara inanmamağa çağırıb: “Mənim adımdan müxtəlif dərmanlar satılır, guya onları mən tövsiyə edirəm. Amma bu məlumatlar tamamilə saxtadır. Dəfələrlə reaksiya versəm də, dələduzlar dayanmır. Mənim rəsmi səhifələrimdən başqa heç bir mənbəyə etibar etməyin.”
Saxtakarlıq əsasən müxtəlif xəstəliklər, xüsusilə oynaq ağrıları, artroz və gut üçün guya təsirli gel və dərmanların reklamı ilə aparılır. Belə məlumatlar montaj olunmuş şəkil və videolarla yayımlanır.
İnsanlar bu cür saxta elanlara, linklərə və reklam olunan məhsullara inanaraq aldanmamalıdır. Rəsmi mənbələrdən gəlməyən heç bir tibbi tövsiyəyə etibar etməyin!
