Azərbaycan Tibb Universitetinin (ATU) Psixiatriya kafedrası və Gedeon Richter şirkətinin təşkilatçılığı ilə “Kariprazin: şizofreniya müalicəsi üçün unikal imkanlar” mövzusunda elmi-praktik konfrans keçirilib.
ATU-nun mətbuat xidmətindən E-saglam.az-a verilən məlumata görə, universitetin rektoru, psixiatriya kafedrasının müdiri, professor Gəray Gəraybəyli çıxış edərək konfransın mövzusunun kifayət qədər aktual olduğunu bildirib. Şizofreniyanın xroniki gedişatı ilə əlaqədar əmək qabiliyyətinin itməsi, etiologiya və patogenezinin dəqiq öyrənilməməsi, bu səbəbdən konkret müalicəsinin olmaması onu psixiatriyanın ən aktual probleminə çevirdiyini qeyd edib: “Psixiatriya sahəsində stasionar müalicə alan pasiyentlərin əksəriyyəti məhz bu xəstəlikdən əziyyət çəkir. Bu gün xəstəliyin müalicəsində müxtəlif preparatlardan istifadə olunsa da, mütəmadi olaraq yeni dərmanlar hazırlanır. Konfransda yeni və səmərəliliyi sübut edilmiş preparatdan bəhs olunacaq. Həmçinin şizofreniyanın mənfi simptomlarına ənənəvi və müasir baxışlar araşdırılacaq, bu sahədə son elmi tədqiqatların nəticələri elan olunacaq. Eləcə də neqativ pozuntuların müalicəsi imkanlarının nəzərdən keçirilməsinə xüsusi diqqət yetiriləcək”.
Rektor şizofreniyanın müalicəsində tətbiq edilən yeniliklərə həsr olunmuş mühazirələrin bütün tibb ictimaiyyəti üçün önəmli olduğunu bildirib.
Sonra V.P.Serbski adına Milli Tibbi Tədqiqat Psixiatriya və Narkologiya Mərkəzinin filialı olan Moskva Elmi-Tədqiqat Psixiatriya İnstitutunun psixi xəstəliklərin müalicəsi şöbəsinin müdiri, Rusiya Tibb Akademiyasının Davamlı Peşəkar Təhsil Psixiatriya kafedrasının müdiri, Rusiya Federasiyasının Əməkdar elm xadimi, professor Sergey Mosolov “Şizofreniyanın neqativ simptomlarının diaqnostikası və müalicəsi” mövzusunda mühazirə ilə çıxış edib. O, şizofreniyanın neqativ simptomlarının əksər hallarda bu xəstəliyin mənfi sosial nəticələrini müəyyənləşdirdiyini bildirib. Eyni zamanda, son onilliklərdə bu əlamətlərin diaqnostik dəyərləndirilməsi və məsələyə yanaşmanın da əhəmiyyətli şəkildə dəyişdiyini vurğulayıb. Mühazirədə Rusiya Psixiatrlar Cəmiyyətinin keçirdiyi sorğuların nəticələrinə və rusiyalı mütəxəssislərin təcrübəsinə də istinad olunub. Qeyd olunub ki, şizofreniya xəstələrinin yarısından çoxunda ən azı bir neqativ simptom müşahidə olunur.
Məruzədən sonra professor S.Mosolov tədbir iştirakçılarının suallarını cavablandırıb.
