Daha məhsuldar işləməyi və yeni şeyləri daha tez öyrənməyi xəyal edirsiniz? Cavab növbəti fincan espressoda deyil, konfrans otağınızdakı divanda ola bilər.
E-saglam.az xəbər verir ki, Almaniya və İsveçrədən olan alimlər qrupu sübut edib ki, cəmi 45 dəqiqəlik qısa bir yuxu beyni "yenidən işə sala" və onun öyrənmə qabiliyyətini və elastikliyini bərpa edə bilər.
"NeuroImage" jurnalında dərc olunmuş bir araşdırma, beyin funksiyasının bərpası üçün səkkiz saatlıq məcburi gecə yuxusunun tələb olunduğu mifini təkzib edir. Məlum olur ki, beynimiz gün ərzində sinaptik yorğunluq toplayır: sinir hüceyrələri arasındakı əlaqələr güclənir ki, məlumatı yadda saxlaya bilək, lakin axşama doğru bu həddindən artıq yüklənmə yeni məlumatı qavramaq qabiliyyətimizi azaldır.
Cenevrə Universitetinin professoru Kristof Nissen və həmkarları aşkar ediblər ki, hətta qısa yuxular belə mövcud xatirələri silmədən həddindən artıq sinaptik aktivliyi azaldır. Sadə dillə desək, beyin yeni məlumatlar üçün yer açır.
Təcrübədə iyirmi sağlam könüllü iştirak etdi. Bir gün onlara orta hesabla 45 dəqiqəlik yuxuya getməyə icazə verildi, növbəti gün onlardan eyni müddət ərzində oyaq qalmaları istəndi. Alimlər neyron funksiyasında dəyişikliklər müşahidə etdilər.
Nəticələr təəccüblü idi: yuxudan sonra beyində sinaptik güc azalıb, yeni əlaqələr yaratmaq qabiliyyəti isə əksinə, xeyli artıb. İştirakçılar oxşar oyaqlıq dövründən sonraya nisbətən yeni material öyrənməyə daha yaxşı hazırlaşıblar.
Nissen vurğulayır ki, gündüz yuxuları yüksək stress şəraitində performansı dəstəkləyə bilər.
Tədqiqat müəlliflərinin fikrincə, bu kəşfin çox böyük praktik əhəmiyyəti var. Musiqiçilərdən və idmançılardan tutmuş hava nəqliyyatı dispetçerlərinə və sürücülərə qədər daimi diqqət və sürətli reaksiya tələb edən peşələrdə qısa bir yuxu performansı artırmaq üçün qanuni və təhlükəsiz bir vasitəyə çevrilə bilər.
Tərcümə: Könül Oruc
